駿景軒

營業中

休息中

一年一度母親節又到，母親大人話要食中菜，於是乎我哋揀咗間位於銅鑼灣同灣仔交界嘅酒店食中菜，呢間駿景軒之前見過拎過米芝蓮，真係一定要去試一試。拔絲咕嚕肉，呢個係我嘅最愛，咕嚕肉炸得鬆脆可口，肉亦都唔會死死實實，非常嫩滑，最震撼我嘅係出邊嘅拔絲，酸酸地加上硬咗嘅糖，咬落去係脆卜卜，加埋佢個醬汁掛落啲肉度，真係非常之送飯。跟住嗌咗黑松露手撕雞，呢味餸真係芬香撲鼻，侍應一拎到埋嚟已經聞到濃濃嘅黑松露味，炸雞皮下面全部都係黑松露撈埋啲雞肉，當雞皮，配上黑松露，加上雞肉一口咬落去，有唔同嘅層次相映成趣。跟住就係叫每一次去飲嘅炸蟹鉗，呢個唔係普通嘅炸蟹鉗咁簡單，佢係松葉蟹鉗，雖然見到佢份量好似比較少，但係佢係重質不重量，一口咬落去，可以睇到一絲絲嘅蟹肉，並唔係就咁用啲蟹嘅粉漿炸出嚟。最後嗌咗個醬油安格斯牛肉，石窩炒飯，安格斯牛肉嘅香氣拼埋蕉香嘅炒飯，另外炒飯上邊仲加上柴魚片，令個口感同個香氣再提升到另一個層次。