穴 (康怡廣場) (已結業)

高水準嘅Omakase廚師發辦（季節限定優惠），性價比超級高第一次嚟呢間餐廳，一坐低已經問我哋有冇食物敏感有咩唔食，好細心，避開晒我哋唔食嘅嘢。每一道菜嘅擺盤都好靚，視覺上嘅衝擊完全比你覺得置身於五星級高級餐廳咁。每食一啖我哋嘅反應都係「嘩！真係好好味！」每道菜嘅煮法都好有心思，雖然係限定優惠，但絕對唔求其。頭幾碟擺盤，我以為自己食緊法國菜，有幾碟係估唔到佢係咁嘅味，真係好有驚喜。每款壽司都超好味，海膽好鮮甜，連個壽司飯都好好味好夾，配合得好好。最後嘅北海道焙茶雪糕同埋豆腐雪糕都好正。其中一碟沙甸魚磯邊卷（入面有白昆布、白䓤、青瓜絲）好好味（忘記影相，冇相片提供）從來冇食過咁好食嘅鰻魚壽司、熟成馬友魚壽司，真係超好食，入口即溶，食完真係即刻想食多件師傅話其中一道菜本來係白子，但覺得唔新鮮唔靚，所以轉左另一款，聽完覺得好窩心。侍應服務都好周到，食到中段幫我哋換過一杯全新嘅熱茶，而唔係加茶，亦完全唔需要提佢做。呢啲細節位係加曬分。好多謝呢間餐廳推出呢個季節限定優惠價錢，令我同朋友可以享受咁好食嘅菜式，感受非常深刻，非常愉快嘅一頓晚餐，畢生難忘。