泰妹餐廳 (The Wave) (已結業)

身為海南雞愛好者，緊係要試勻唔同餐廳嘅海南雞飯，呢間係我近期食過最好食嘅海南雞～我係經deliverzoo叫外賣，估唔到水準都好高。隻雞有額外包裝，用個盒裝住，三款醬汁比得好足，有酸辣汁、甜豉油同用蒜蓉整嘅汁（唔知佢叫咩，食得出有蒜蓉味）。呢個飯色澤偏鮮黃，飯質軟軟地，濕度適中！係我鍾意食嗰種飯嘅口感，配海南雞飯食好開胃。通菜有三種配料揀，我揀咗馬拉盞，呢種最有泰式風味。啲菜好翠綠，好入味好好食，雖然有辣椒但我覺得唔算辣。泰式甜品拼盤呢個點餐嘅時候唔知係咩嚟（deliverzoo app冇寫），原來係椰汁椰果西米露同糕。西米露係暖嘅，好濃椰漿味，好似成罐倒晒落去咁，啲西米露好大粒。加椰果有啲新奇。至於個糕，暖暖地煙煙韌韌，好重斑蘭味。所有菜式都好滿意，個海南雞飯令我好開胃，用咗少於半個鐘就食晒成餐飯🤣，食得好滿足！一定會再去食堂食。