E Burger Cafe (聯和墟) (已結業)

講到粉嶺高汁Burger，必定要數由海聯廣場「伊之吧」酒吧轉型賣 Burger 仲搬埋去囍逸嘅 「E Burger Cafe」。未搬前其實我已經介紹過，因為佢重料又好味，喺粉嶺區實屬難得。搬咗囍逸之後，店舖走文青風格，更加清新明亮，枱同枱之間唔會太迫，個人就覺得舒服好坐。（因為舊舖啲櫈好低，食嘢有啲辛苦）我食飯不嬲都會避開 Lunch Hour，12:00左右到，店內仍有一兩張枱，我哋唔使等位就可以入座。1:00左右嚟稍為要等一陣，都唔算等好耐，只係如果人多就要分開坐。坐低見到有一個 「impossible」嘅 promo。餐牌上有兩個素食選擇：焦糖洋蔥不可能漢堡同黑松露蛋牛油果漢堡包。無咗以前嘅 portobello mushroom burger。因為我想食牛油果就選擇咗後者，Vegan 嘅朋友可以選擇 impossible 嗰個呢。黑松露蛋仍然整得非常香同嫩滑，中間有一大層牛油果片，我覺得個版本正過以前嘅大啡菇burger，加上番茄片同埋我最心心嘅火箭菜，好好味呀！呢個包簡直係為我而設㗎。😍個包實在太大，不過咁好味我又唔想浪費，所以放棄咗啲薯條食晒個包。食完飽到一返到屋企立刻瞓着