山頂采蝶軒 (已結業)

機緣下哩到山頂嘅采蝶軒一嚐高級中菜，加埋熨貼嘅服務同舒適嘅環境（可能因為閒日晚市唔多人），仲有夜景睇，（雖然睇唔得晒成個夜景），都好滿足啦！雖然菜餚份量好足，用料唔差，煮法有心思，但始終係得山頂，收費都唔平，要有D心理準備。整體哩講，餸菜都頗有水準，但唔係道道菜都咁有驚喜！不過，其中都有幾款菜係甚得小弟歡心。 金銀明蝦球，「金」就係脆炸蝦球，粉漿夠薄夠脆，蝦球做得夠彈牙，食落又唔會一舊粉，仲配咗兩款醬：甜酸醬同沙律醬，中和咗感覺無咁熱氣；「銀」就玻璃蝦球，大大隻蝦球有睇頭，炒得啱好，好爽口，獻汁唔過杰，好好食！玉樹麒麟斑，方便鬼佬食嘅魚鮮，點解？師傅將星斑起肉，隔住一片金華火腿、一片冬菇哩蒸，無晒骨，唔怕哽親！斑片有火腿鹹香，又有冬菇鮮香，唯獨是係鹹咗D！燉湯都唔錯，川貝海底椰燉白肺，原窩清燉，湯渣放晒上碟，高清睇真，真材實料，又有川貝，又有海底椰，夠晒滋補啦！飲落，清潤，潤喉，飲完要再整多碗先。 招牌菜：京烤骨，一大舊豬肋骨配以糖醋、蠔油炆煮，有D似東玻肉，不過無咁肥，只係表面一少層肥膏，炆得鬆化入味。仲有，跟炸迷你饅頭， D饅頭細細個，表面炸得啱啱好，外脆內軟，沾上醬汁同吃，唔晒嘥