龍門棧 (已結業)

早幾日同媽咪喺灣仔行街，見就快母親節就請佢食一餐好既。呢間茶樓名不經傳但就喺openrice見好評如潮，試一試果真唔錯。我地除左食炒飯以外都試左不少點心，全部都是以新派方式料理，無論係賣相或是味道都與別不同。我自己會推介松露野菌餃，平時食既水晶餃餡都是淡而無味，但呢道野菌餃一咬已經香氣四溢，菌香爽口，而且松露味十足，但又不會太過龍。另一道係雞扎，雖然相對比較貴，但物有所值。雞扎睇落賣相同平時相差無幾，不過內有乾坤，看似入面是平時既蟹柳魚肚，裡面原來係准山花膠同蘆筍，非常高檔，而且食落味濃而不膩，雖然材料不一樣但同樣夾和入味。仲有一道係見好多人都點既啤梨咸水角，外皮酥脆，一食就知係即叫即整，媽咪仲話好似有少許啤梨味，不過我自己就唔多覺。平時我唔太鍾意食咸水角，因爲感覺太油膩，呢道完全唔油，仲好香口，內餡亦豐富，真係顛覆左我對咸水角既印象。總括而言，呢度雖較貴但物有所值，要試一啲精緻點心呢度係唔錯既選擇。而且水滾茶靚環境優雅，好岩一家人黎嘆茶，享受一個美好周末。