One More Hotpot 來一鍋 (已結業)

同友人胃口大開，想食火鍋放題，友人就喺openrice搵到呢間。book左18:30，去到水靜鵝飛，得兩枱打緊。被安排坐卡位，中式放題西式格局，都幾格格不入。叫左藥膳湯底餐，花膠螺頭雞，但冇哂螺頭，其他湯底又唔啱心水，所以都係照叫。餐紙上可以任點，肉同埋創作配料就跟人頭俾。最驚喜係有紅酒白酒任飲，雖然同火鍋唔夾，但第一次有餐廳供應，所以都叫左杯紅酒試下。啤酒最正，個啤酒杯雪埋，超冰凍，打邊爐一流。湯底有埋半隻雞，都幾阻住，要就住黎淥，拎走又驚湯底冇咁濃......呢個牛好正，不過係計人頭俾，冇得encore。第一次食咁長嘅響鈴同魚皮，魚皮炸到好香好脆，響鈴相比之下失色，一啲都唔脆。叫左好多野，間野好貼心地好似high tea咁放，方便拎。友人喺食評見到有甜品送，就問下侍應係咪有心太軟。火鍋店嘅心太軟竟然好味過一般甜品鋪，估唔到。不過間野唔夠主動，要客問先送甜品。