鷹巢

營業中

休息中

同屋企人去食飯，都想坐得舒服啲，食得開心啲。 今晚就去咗 鷹巢 食飯，預祝母親節。我哋預訂咗 澳洲龍蝦嚐味海鮮套餐，非常豐富。一開始先有幾個小食：冰燒三層肉、蜜汁脆鱔同埋叉燒皇。我想講冰燒三層肉真係好香脆又夠味；叉燒王用咗半肥瘦豬肉，肉質軟冧；最好味係蜜汁脆鱔，皮脆肉嫩，起晒骨啖啖肉，好味道！芝士焗蟹蓋好啱小朋友食，大量蟹肉同芝士撈埋一齊，放喺蟹蓋上面，好睇又好食。原個椰皇花膠燉雞湯好滋補好好飲，椰子味好香，入面仲有螺頭同花膠，好足料！之後就到重頭戲：碧綠彩椒炒澳洲龍蝦球😍 呢個菜式擺盤好靚，色香味俱全！澳洲龍蝦球肉質鮮美，龍蝦肉結實爽口，輕輕調味已經好好食😋😋😋 大啖大啖龍蝦肉咁食真係好正，非常滿足～玉梨帶子係一個口感同味道都好豐富嘅菜式，香梨墊底解肥膩，上面係炸咗嘅帶子同蝦膠，帶子都好厚肉👍🏻媽媽最鍾意食荷香雲腿蒸龍躉球，分量十足，龍躉好新鮮，好有魚味，無乜骨，配咗少少金菇味菜等等調味，幾好食。食完咁多餸之後仲有南乳吊燒雞同蟹肉伊麵，呢個套餐真係好豐富。最後仲有棗皇糕同埋紅豆沙，大家都食到飽飽的。呢度環境幽靜舒適，下次同屋企人食飯都可以再嚟呢度！