亞玉冰室 (已結業)

亞玉冰室相信住係元朗區既朋友無幾多個唔識，之前都食過好幾次，返食得就當然好食先會返轉頭，今日中午就再黎同朋友們食個午餐。餐廳門面同格局都同傳統既冰室有幾分似，同而家新派既冰室不同，但食物款式邊方面都比較有特色，例如焗野炒野之類都同一般茶餐廳款式不同，而味道都好夾。芝士豬頸肉煎蛋焗飯呢個我之前食過焗通粉，今日肚餓d食焗飯，先講個炒飯底夠乾身得黎唔會好硬，份量都好足，夾埋芝士汁絕配，豬頸肉大約有4-5塊，肉質爽口奕有調過味唔會淡茂茂，煎蛋就正常一隻熟蛋，成個餐好豐富。窩蛋芝士吞拿魚焗意粉朋友A揀既，意粉口感唔會過腍，吞拿魚同芝士汁都好足，窩蛋經過咁熱既焗汁轉頭都熟左7成了。亞玉鴛鴦焗飯朋友B揀既，鴛鴦即係雞排同豬排，茄汁同白汁，食到兩款排同兩隻汁，排炸過唔會好乾。凍檸茶少甜自己揀左少甜，茶味偏淡d，篤完檸檬酸味比較重。另外都介紹下亞玉既特色紅豆冰系列，跟餐加10蚊就有1杯大大杯，啤酒杯咁大，有溝埋咖啡或奶茶，之前就試過紅豆冰咖啡，個人認為就比較甜，同埋真係太大杯飲唔晒，有興趣既朋友不妨試試。整體黎講亞玉既食物幾有質素，款式都有特色，價錢黎講算中規中矩啦，無話太平又未到好貴，值得推薦。