蠔灘 (已結業)

今日請假同男朋友去完海洋公園慶祝佢正日生日之後，夜晚係香港仔揀左間有得食佢鍾意既生蠔既餐廳食飯。我地叫左一打生蠔、蟹糕燴意大利飯、黑松露蟹肉日本年糕，本身想叫西班牙油炸鬼作為甜品，點知已經無得供應，所以揀左侍應熱情推介既泰式生蝦刺身。生蠔來自法國Tatihou，雖然只係十蚊一隻，但食得出生蠔好新鮮，絕對性價比高，叫一打都嫌少。泰式生蝦刺身有六隻，醬汁用左泰國辣椒調配，真係堅辣。生蝦肉質結實，辣得好刺激。蟹糕燴意大利飯唔係好稠身個種，但意大利飯索晒啲湯汁，十分入味，幾好食，加埋蟹糕就一流。黑松露蟹肉日本年糕幾煙韌，好少見黑松露配年糕，個配搭都唔錯。