川熙樓 (已結業)

唔知點解呢排好想食川菜，但係唔係好多朋友鍾意食，難得咁啱鍾意食川菜嘅朋友得閒， 就拿拿臨約埋佢一齊去試下呢間喺酒店入面嘅川菜。首先黎嘅係辣子肥腸，好大碟，辣椒多肥腸仲多，賣相超級吸引，黎緊嗰陣已經聞到一陣麻香味。 佢啲肥腸好乾淨，係炸過嘅，炸得好香脆，亦都將裏面啲肥油炸曬出黎，食落口一啲都唔肥膩，有啲仲脆到好似薯片咁卜卜脆，辣度適中，夠麻夠香，愈食愈上癮。 泡椒酸菜魚份量都好多，泡椒味夠出，但係亦都唔會搶左酸菜嘅風頭，辣得嚟夠酸，魚肉已經起曬骨，吸曬啲湯之餘仲好嫩滑，飲一啖個湯，完全係精華所在。 最後嚟一個麻油雞麵，放低已經聞到陣麻油味，隻雞係用雞腿肉，好嫩好入味，麵夠煙韌彈牙，就算放咗一段時間都冇淋到。