圍威喂 (荃灣廣場) (已結業)

💁🏻‍♀️之前食過呢間fusion泰菜印象唔錯，經過見到而家外賣套餐低至六折，非常實惠，有1/2/4/6人套餐選擇，一於試吓。我哋叫咗$248二人B餐另加燒豬頸肉 ($98)-晚市餐牌外賣自取八折，等外賣期間都見到有唔少人order，同堂食一樣咁高效率，等咗一陣就有得拎啦！🥡外賣包裝好用心，即使外賣返屋企賣相一樣精美，餐盒嘅設計有撕開位，好快就可以擺得靚靚用餐。食泰國菜醬料係亮點，即使係外賣優惠套餐，餐廳一樣一絲不苟，🌶每一款菜式都跟足唔同嘅醬料。二人餐份量非常足，頭盤🍤蝦餅紮實彈牙，真材實料，冬蔭功單骨雞翼香脆惹味，🐓海南雞半隻大大份兩個人食綽綽有餘，仲要去晒骨食得非常暢快，雞味濃香肉滑，🍚油飯香氣十足，淨係呢幾樣食物已經值回票價！仲有塔香炒青口拎到返屋企食都一樣嫰滑，醬汁香濃送飯一流，跟餐嘅🥬馬拉盞通菜同兩杯🍹青檸梳打一樣有水準，另加嘅🐖燒豬頸肉惹味焦香，爽滑彈牙配埋秘製酸辣汁💯！好耐都冇試過晚餐食得咁豐盛，好滿足😋💡所有食物拎到返屋企都保存得好好， 如果要加熱原盒放入微波爐就得，呢度嘅外賣實在係高質之選！