龍驤 (已結業)

今日終於又放假啦，專登同friend嚟到尖東呢間龍驤，午市套餐做緊8折，經OpenRice訂座就有75折，真係好抵食。餐廳入面嘅裝修好日式，一入去就見到好清雅嘅吧枱，坐喺度食飯真係充滿風味。我要咗香蔥吞拿魚蓉丼。每份套餐都配沙律、茶碗蒸同埋麵豉湯，另外都可以加錢要飲品，有汽水、烏龍茶、果汁同埋啤酒。啱啱落完單冇耐，就見到師傅準備緊我嘅吞拿魚蓉丼。佢嘅賣相靚到忍唔住影多幾張相，壽司飯上面鋪咗大約三、四cm厚嘅吞拿魚蓉，加埋蔥、芝麻同埋海膽，側邊仲有紫菜碎。佢嘅吞拿魚顏色鮮紅，一睇就知好新鮮，比起普通壽司店粉紅色嘅吞拿魚蓉好好多。食落真係好鮮甜，一啲都唔腥，份量同埋配搭都好好，好好味。前菜沙律都好新鮮，配埋麻醬好開胃。麵豉湯都好足料，唔係嗰啲飲完會好口渴嘅鹹麵豉湯。個人認為佢個茶碗蒸真係好值得一試，食落真係好香滑。見佢Lunch time真係好多人嚟食，好快已經滿座。如果想食嘅話，記得要book定位啦。