神輿日本料理 (已結業)

有次上網見到神輿呢間啲裝修好日本風好靚，加上好耐冇食放題，就同老公星期五晚放工黎試吓，我哋訂咗7:30，一去到就即刻安排入座，侍應姐姐亦都即時介紹甜品可以喺出面攞，仲好貼心咁送上兩杯熱茶。坐低即刻叫咗一盤刺身，有甜蝦帶子象拔蚌螺等等，全部都好新鮮好鮮甜，數量又足，最開心嘅係有海膽壽司/手卷，同埋入口即溶的和牛壽司！！其他燒物同炸物都幾唔錯，尤其是啲串燒，鹽燒雞腎同黑椒豚肉串都好香口，叫完一轉要再encore！食完啲細件野我老公叫咗稻庭烏冬，而我就口痕叫咗個牛肉壽喜燒，個湯底好甜好味呀，細細個份量好夠我食！到甜品時間，雪糕就一定要食紅豆味同綠茶味，嗰度仲有好多配料俾你加，可以整到靚靚先返埋位食！另外值得一推嘅係木糠布甸同埋北海道牛奶布甸，超滑又香牛奶味，同老公食完一轉又一轉，兩個人飽到捧住個肚回家！總括來講呢度坐得又舒服，服務又好，下次會約多幾個朋友一齊嚟！