孔夫子 (Club East洞天) (已結業)

今日老闆請曬一眾手足去食lunch。從來都未聽過呢間"孔夫子"，本來都無乜特別祈望，但去到之後，見到樓下個管理員叔叔已經好有禮貌，心諗，喺呢度開得舖，應該都有番咁上下。入到酒樓一坐低，見到枱面上方咗一個用竹做成嘅書"論語"做裝飾，就覺得有心思。見到menu入面有黑毛豬叉燒、黑毛豬叉燒包、松茸蘑菇包……有好多好特別嘅食物。老闆好豪爽，點咗好多好嘢俾大家食。除咗蝦餃、魚湯鮮竹卷、黑毛豬叉燒包等等的點心之外，仲有銅盤鱔蒸飯、鮑魚麵、西芹炒海蔘、臘味炒芥蘭……全部食物都好好味，當中"孔府招牌腸粉"好特別，裡面有一層脆脆，入面包住D素料，幾清爽。燒乳豬整得非常好食，外皮鬆脆，肉質嫩又能保持肉汁，非常高營。另外炸蝦亦有驚喜，用咗類似橙汁嘅汁做點綴，甜甜酸酸，好好味。另外，西芹炒海蔘中的海蔘份量不少，臘味炒芥菜中的臘味包含臘腸、膶腸和臘肉，可以照顧到不同人的不同口味。服務質素亦不錯，侍應生反應快。差不多我地一打開個茶壺蓋，就有人幫我地加水。整體而言，高水準，高質素。