別府駅前料理 (青衣城1) (已結業)

嗰日經過青衣城嘅”別府”，見到有個新餐牌 ，主打和牛壽喜燒同拉麵 ，賣相好似好吸引 。今日終於有機會去一試究竟， 好彩都冇令到我失望。 我哋嗌咗一個”宮崎牛壽喜”$228。 率先上碟嘅就係一份和牛 ，睇圖都見到雪花同肉嘅比例十分均勻， 一睇就知個牛一定唔差。個壽喜燒嘅湯底都調教得剛剛好，我個人唔太喜歡食太甜嘅湯底。 除此之外仲有好多配料例如冬菇等等，而個豆腐就非常之滑 。和牛放咗一陣之後， 夾起一片，放入個爐度拖兩拖 ，等幾秒就食得， 沾滿蛋汁，一啖入口就慢慢溶 化，絕對可以用享受兩個字嚟形容呢一片牛肉。 另外我哋仲點咗一個”宮崎牛火灸拉麵 $98”。湯底的味道十分濃郁， 同樣地和牛嘅口感同肉質都好好， 食曬啲拉麵我都忍唔住要飲多兩啖湯底 。另外要讚嘅就係服務員好貼心， 因為我哋另外單點咗兩杯嘢飲， 佢就好善意咁提議我哋不如追加個烏冬/白飯轉做套餐，咁樣變相杯嘢飲就唔使錢。 呢啲做生意咪叫做老實囉。