千両 (九龍酒店) (已結業)

今日再次嚟到我同老婆最愛嘅日本餐廳，順便用埋$100會員coupon。千両嘅午市套餐CP值真係超高，食物亦非常有質素保證，環境亦十分寬敞舒適，我哋差唔多每個月都會至少嚟一次！我哋叫咗個刺身套餐、壽司牛肉烏冬套餐同一客三文魚腩壽司。哩度嘅刺身全部都好新鮮清甜，特別鍾意帶子、鮑魚同吞拿魚腩。鮑魚鮮味十足，口感彈牙，但一啲都唔靭。吞拿魚腩超肥美，有入口即化嘅感覺。佢個飯加上甜蛋絲同魚籽都勁好食，味道香甜，珍珠米彈牙，加上豉油，甜甜咸咸咁十分開胃。佢哋嘅三文魚腩壽司亦係我同老婆每次必叫嘅，魚油味好香，亦有入口即化嘅感覺，食嗰一刻真係有感動嘅感覺，超正！會一直幫襯！