INN - I’m Not Nothing (已結業)

之前係元朗食過一次INN環境唔錯，今日同朋友經過荔枝角搵野食，見到分店就決定去食。我同朋友每人點左個set lunch, 是日餐湯係南瓜忌廉湯，第一次飲湯都有精美拉花😍餐湯口感非常濃厚，南瓜味好濃😋燒火雞胸肉牛油果醬漢堡配薯條🍔粗薯條炸得金黃香脆，外脆內軟，漢堡麵包有烘底，牛油果醬做得非常出色，配合厚切嘅火雞胸肉口感一流，加上入面嘅芝士、生菜、番茄食落好有層次，係非常有驚喜而值得食嘅漢堡👍🏻香煎焗厚切豬肉眼配金巴車厘子醬🐷豬肉眼扒煎得啱啱好，厚切咬落肉汁充足，煮嘅火喉恰當，肉質鮮嫩可口，再配合表面略帶甜嘅新鮮車厘子醬，整個配搭令人非常滿足😆飲品🍹叫set lunch點特飲都有半價，我同朋友分別點左派對白桃烏龍茶同青檸薄荷梳打，白桃烏龍茶用咗新鮮白桃，飲落有淡淡清香。青檸薄荷梳打就有好多薄荷葉，飲落非常清新。總括而言，餐廳環境舒適，食物質素高，食得出廚師嘅用心，每人平均消費$150，下次有機會會再去食。