第三站

星期日同老公去旺角樓上Station 3 Cafe食晚飯。呢啲有board game玩既樓上cafe買少見少，難得食物質素仲要好高質。我地叫左兩個Dinner Set，一個加左$38要田園沙律同蛋糕，再另叫松露薯條。松露薯條超級大兜，新鮮即炸，上碟好夠熱，薯條外脆內軟，好好食。田園沙律落左好多胡麻醬。黑松露帶子鮮菌燴意大利飯意大利飯軟硬適中，用上珍珠帶子，反而可以每啖都食到，加上雜菌同黑松露，真係好好味。煙三文魚野菌忌廉闊條麵煙三文魚捲成花花樣，好有心機，忌廉味好濃郁，條條闊條麵都掛到汁。法國朱古力芝士蛋糕一層朱古力慕絲，一層朱古力蛋糕，一共四層，有層次感，朱古力味夠濃，唔錯。飲品加左$4要榛子朱古力同特濃朱古力，兩杯都唔會太甜，朱古力又出。