兄弟幫食堂 (已結業)

工作關係，最近經常係旺角覓食，發掘咗唔少好去處，兄弟幫食堂係其中一間。呢度每日午餐有四款選擇，配埋嘢飲最平五十蚊有找，幾抵食。呢排幫襯過三次，三次都滿意。第一次試泰式，叫咗泰式四季豆肥牛飯，我好鍾意個調味，醬汁微辣味濃，撈飯一流，肥牛又夠多，勁正。第二次試中式，叫咗蔥油鹹魚肉餅飯，肉餅煎得鹹香，配埋淋喺上面嘅蔥油，又係餸飯一流。第三次試西式，叫咗香煎比目魚扒配蜆肉白汁意粉，由於冇比目魚扒，結果轉為炸魚柳，雖然肉質冇比目魚咁肥美，但都算嫰滑，唔錯，白汁正常調味，可惜醬汁略少，令到意粉有啲乾身黏口，意粉亦略嫌稍腍。總括嚟講，呢度地方企理，午餐質素高之餘亦好抵食，值得推介。