紅橋 (已結業)

係旺角OT完，梗係要搵好野食醫番個肚啦。途經西洋菜南街，見到一間食fusion菜既餐廳 (紅橋)出面人頭湧湧咁等緊位，好奇心驅使之下就去試下。佢有唔同種類既食物供應，有餐前小食如春卷，雞翼，薯角等，另外仲會有唔同種類既沙律。主食就會有三文魚扒，安格斯肉眼牛扒，芝士焗波士頓龍蝦等。如果呢啲唔啱都仲可以選擇焗飯，意粉，甚至有馬來西亞式既食物如海南雞飯或者咖哩等等。咁我就叫左南瓜忌廉汁燴意大利飯配粗露荀及火燙北海道帶子 (HKD 88)，要左中湯 (加HKD 12)，轉紅豆冰 (加HKD 6)。小食就叫左紫蘇葉蝦春卷 (4條，HKD 48) 。先黎既係中湯栗米紅蘿蔔豬肉湯，火喉唔錯，用料幾足，唔會好咸。跟住黎既就係個南瓜意大利飯，有粗露荀同野菌。上碟既時候已經聞到濃郁既忌廉味，隻帶子表面係用火燙過既，整體賣相唔錯。 食落去既時候，食到南瓜味，帶子肉質鮮甜，意大利飯既濕度掌握得啱啱好。 跟住黎既就係個春卷(有4條)，炸得幾香脆，內面係用紫蘇葉圍住既大蝦，食落去唔油膩。另外，可以點沙律醬，口感可以更加豐富。至於個紅豆冰，有好多好大粒既紅豆。佢個個冰超大，飲落去覺得好香好滑，正。