泰上皇 (已結業)

第一次嚟呢間工廠大廈嘅泰式餐廳，環境幾光猛，有好多張大枱。餐牌有好多選擇，價錢都唔平。蒜蓉包（$28）焗得好脆好夠味😋同埋好大嚿有4嚿😍泰式烤酥餅（$28）好鬆脆，食嗰陣時都會散，但係佢就一D汁都冇比🙁，可能當我哋點咖喱食。泰式炸春卷（$65）個皮好薄好脆，炸得靚唔會太油膩👍🏻海南雞 半隻（$129）半隻嘅份量都多👍🏻雞肉好滑好嫩，但係竟然係暖嘅😅我就冇所謂。泰式豬頸肉炒飯（$79）都有三四碗嘅份量，炒得好香，差唔多啖啖都有豬頸肉粒🤤冬陰公清湯牛腩（$168）我第一次試冬陰公清湯，好開胃小小辣同埋酸，牛腩都有好舊，幾腍，仲有啲雜菇👍🏻泰式串燒 半打（$89）都幾抵食同埋好大舊🤩有兩串豬、兩串牛、兩串雞，一啲都唔嚡。泰式蝦球炒西蘭花（$95）佢用嘅蝦係比較細嘅品種，但係冇乜蝦味😕但係用蒜蓉炒西蘭花就幾香。泰式馬拉盞炒通菜（$75）炒得好香，都有啲辣，份量啱啱好。仲送咗啲椰青糕😍好似大菜糕嘅口感，唔會太甜。食物質素唔錯😋服務態度都幾好，價錢唔算平但係合理。