金記冰室 (新港城中心4期) (已結業)

身為馬鞍山街坊，成日行過金記門口都會見到有人龍排隊。搞到我都好想去試吓究竟佢啲嘢好唔好食，早兩日晏晝就終於嚟食下午茶啦。我哋叫咗招牌焗豬扒飯、金記炸雞髀、無骨海南雞油飯套餐、金粒西多配雪糕、金記三文治、香滑奶茶、凍檸檬利賓納。🔸 招牌焗豬扒意粉豬扒好厚、食落好鬆軟同埋焗得好香，每一啖意粉都沾滿左啲蕃茄汁同埋芝士，好好食！果然係招牌！🔸金記炸雞髀雞髀大隻，炸得香脆又醃得夠入味，肉質juicy，啖啖肉好滋味。🔸無骨海南雞飯套餐（配油飯）呢個餐有跟老火靚湯，飲落幾舒服冇味精。海南雞好肥美、好滑！同埋冇骨食得好方便，再點埋佢啲姜蓉同埋黑豉油食好好味！油飯用雞湯來煮所以食落好香同埋一啲薑嘅味道。🔸金粒西多配雪糕一口size嘅西多炸到金黃色，一啖一粒，淋上煉奶連埋朱古力醬同埋雲呢拿雪糕一齊，食好邪惡但滿足。🔸金記三文治脆卜卜嘅方包夾有午餐肉、好厚好滑嘅炒蛋、生菜、蕃茄同芝士火腿，材料好豐富好味又飽肚，尤其是中間嘅炒蛋真係好滑，好好味。