港原味 (已搬遷) 新店位置

朋友喺呢頭住，佢約我食晚飯，佢話帶我去一個打卡好地方，原來就係呢個有好多香港地方特色壁畫嘅餐廳😆。我哋叫咗個$198嘅二人套餐，可以係餐牌度任揀兩款小菜，仲包兩個白飯、例湯、一個芝士焗蟹蓋、同埋飲品，幾抵。例湯先上，用個燉盅裝住，賣相幾靚，好似係青紅蘿蔔煲豬骨，幾好味😋。小菜我哋就揀咗「豉椒蒸排骨」同「黃金蝦」。呢碟排骨都算幾多肉，用豆豉同紅椒撈埋嚟蒸，簡單得來幾惹味；黃金蝦被薄薄嘅脆漿包住，表面仲沾滿熱溶咗嘅鹹蛋黃，非常香口好味😋。焗釀蟹蓋上邊係芝士入邊係薯蓉，幾好食😋。我哋不約而同都叫咗熱杏霜，唔係好甜熱辣辣幾好飲😋。我仲讚閨蜜帶咗我嚟呢間抵食又好食嘅餐廳，不過我冇話俾佢知嘅係，其實我之前已經嚟過😆。