La Postre (已結業)

今晚約左朋友食位於銅鑼灣耀華街的La Postre，我地6:30pm 都未夠就到，餐廳客人唔多，環境寬闊，寧靜有情調，我地被安排坐在Bar枱的沙發位，好relax。兩個人，先點了芝士煎蟹餅。熱辣辣，蛋餅好鬆軟，夾住香濃芝士同蘑菇粒，仲有一隻隻足料蟹鉗，味道好夾，好有口感。主菜係見到好多人都會點的啤酒海鮮火鍋，因為我唔食辣，所以揀左蕃茄忌廉啤酒湯，店員送上時會為你介紹唔同的海鮮，有帶子，虎蝦，蟹鉗，蜆同螺肉。打開煲蓋已經聞到好香的啤酒味，海鮮非常足料又新鮮。最鍾意虎蝦，好大隻，肉質爽口彈牙。螺肉煮一煮後，鮮味更出，仲有我好鍾意隻蛋黃醬，加了拉差及蒜，味道獨特，令海鮮變得更惹味。食完海鮮之後有一隻小杯裝啤酒海鮮湯飲，真係好好飲，鮮甜海鮮味，香濃啤酒味再加清新蕃茄味，一杯接一杯，差唔多飲哂。甜品叫左個雜果麻糬窩夫，賣相真係一流。窩夫入面的麻糬煙煙韌韌但唔痴牙，上面嘅雜果款式多，有酸有甜，加埋個雪糕同蜜糖，好有層次，非常特別。