KidsKiss Kingdom親子餐廳 (已結業)

因為小朋友喺石門返學，每次放學都會經過呢間親子餐廳！所以久唔久都會入去玩下～今日老師讚佢好乖全部學識晒！所以獎勵佢入去玩！小朋友非常開心，好鍾意嚟呢度玩～波波池、小火車、小超市、巨型氣球～全部都好好玩好鍾意！見小朋友玩得咁開心父母就開心啦！食物方面以西餐為主！味道高水準的！所以價錢比較高少少，但係物有所值！輕量版卡邦尼意粉，白汁濃郁非常好味！意大利粉彈牙！仲有新鮮蔬菜～好香甜！小朋友叫咗兒童餐，漢堡扒配白飯，有生果、蔬菜、配一杯蘋果汁或者橙汁！份量非常足夠小朋友都食唔晒！我自己就叫咗杯熱嘅水果茶，味道出奇地夾！好清新帶少少酸味！加埋蜂蜜～好香甜！咁啱廚師研發一杯新產品比在場人士試飲！紅火龍果奶昔，都幾好飲喎！奶味香濃順滑，清清地嘅火龍果味！味道好夾！而且顏色漂亮！連小朋友都要搶着飲！不錯！一大一小三百幾蚊，有得玩而且嘢食又好食！值得推介！