喜鍋 海鮮‧火鍋‧小廚 (已結業)

玩完水梗係要食餐好㗎啦，今晚我哋諗住打邊爐。好耐未食過藥膳雞煲，所以我哋個湯底揀咗藥膳醉雞，見到佢個湯底都真材實料，真係越煲越出味。到最後食菜嘅時候個湯簡直係甜到不得了。佢啲雞真係滑到不得了，真係有啲後悔淨係嗌左半隻。食完晒雞之後我哋就嗌其他打邊爐嘅餸，其中我哋叫咗個黑毛豬，雖然得四片，但係片片都好大塊，兩個女仔來講其實都夠。我哋叫咗個三色滑，分別係黑松露墨魚滑，蟹子下滑同埋瑤柱墨魚滑。墨魚滑都好彈牙但係蝦或者爭少少。另外我哋仲試咗佢半分韭菜餃，不過如果嗰啲餡可以再多啲就好啦。海鮮方面我哋叫咗個即食嘅磯煮鮑魚，佢個鮑魚都好入味而且好厚身，夠晒彈牙，最重要係而家做緊優惠價$18.5就食到啦。另外我哋仲叫咗個海鮮拼盤，都係做緊優惠價$168，有齊五款海鮮，全部都好新鮮，隻蝦仲識郁嘅添。然後就有我最鍾意食嘅魷魚鬚，平時一條魷魚都得幾條鬚，但係今次成碟都係魷魚鬚，唔使爭。我哋叫咗個蔬菜拼盤，都有四款唔同嘅菜，其中芥蘭苗都幾好食。另外最正嘅係啲蘿蔔，煲到最後索晒啲湯，啲蘿蔔又夠甜又冇渣。食到飽飽拎埋佢個社交平台仲有八八折添。