十三少 (已結業)

今晚收工去左堅尼地城既十三少食川菜。小食係炸黃豆，脆卜卜，好香口。椒麻皮蛋椒麻皮蛋真係同上次一樣咁好食。皮蛋應該有兩隻，切開之後擺好喺隻碟，中間就放好辣椒蓉同蒜泥，個汁加左醋，少少酸辣，一啲都唔麻，好開胃。透明蛋白超彈牙，個蛋黃又滑又香，質感好正。豬手豬手一客有10件，份量超多，熱辣辣上枱。豬手炆得超腍，骨膠原重，食完個嘴黏黏地，唔覺肥。食落帶少少辣，好好食喎。十三少酸菜魚十三少酸菜魚真係超大碟！酸菜魚嘅湯底係用魚湯整，服務員建議可以飲一啖先。連皮魚片有好多，非常滑又有鮮魚味兼冇骨。叫左少辣，辣度好啱。除左酸菜，其他配菜仲有菇片，萵苣片，同白蘿蔔片，吸左個湯都幾好食。再加上薑絲，大量白芝麻粒，辣椒，花椒，味道調得唔錯，唔會太辣或過麻。呢度酸菜魚真係好好食，魚鮮肉嫩。紅糖糍粑就算幾飽，都一定要食甜品。糍粑一客8件，伴有紅糖醬，擺盤唔錯。糍粑炸得皮脆而內煙韌，但係全不油膩，伴少少紅糖醬食有少少甜味就夠。服務員殷勤加水，又會幫手換碟。食甜品都會幫你換新碟。值得一提係呢度供應免費檸檬凍水，可以幫辣嘴降降溫。最後要多謝友人請客。