阿久根和牛立燒店 (已結業)

久久都無出去旺角，出開黎就梗係要揾啲好嘢食啦。朋友介紹旺角有間幾特別嘅和牛燒肉店，燒肉控的我又怎會錯過！’阿久根和牛立燒店‘一聽個名以為企喺到燒肉😂，但原來都有櫈坐，只係坐高櫈啫。店舖不大，只能容納10多人，吧枱高櫈嘅格局，走日本居酒屋風格。呢度主打食日本和牛，全部都係A4、A5級質素。另外，仲有好多小食如和牛他他壽司、和牛刺身、銀鱈魚干、河豚干、一夜干魷魚等等。今晚我地叫咗一人盛”風味和牛定食”，再另點了A4和牛上胸腹、後胸腹、三角肋肉、A5和牛肉眼同一些其他食材如黑豚肉、雞腿肉串、雞腎。“風味和牛定食”包含A4肉眼、西冷、牛舌同牛肚，4種完全不同的口感。牛舌較有質感，西冷牛味出眾，肉眼則油脂香濃，最特別就係牛肚，爽口而淡香。連沙律、麵豉湯都好好味。沙律菜新鮮爽口，麵豉湯不會過濃過鹹，帶有蜆肉嘅鮮味。再配上加咗飯素嘅珍珠白飯，大滿足！單點嘅和牛都有大理石油花，油脂豐富，肉味香濃。上胸腹、三角肋肉相對比後胸腹肉質較嫩，油脂較多，入口即溶。最後嘅A5肉眼油脂仲有淡淡嘅奶香味，真係一試就會愛上！雖然小店一間，但和牛質素比得上很多過江龍日式燒肉店 ，勝價比很高。