明發小食

營業中

休息中

第一次嚟到深水埗嘅明發小食，緊係要試下佢哋嘅招牌菜啦。我哋點咗淨湯鴛鴦餃子，分別有韭菜餃同椰菜餃。餃子皮薄餡靚，椰菜餃入口爽甜，而韭菜餃加咗爽脆嘅馬蹄，中和咗韭菜濃烈嘅味道，平時好少食韭菜餃嘅我，都忍唔住要食多隻。如果鍾意有少少辣嘅，仲可以再加埋辣椒醬呀～之後出場嘅係懷舊豬油渣麵，聽到豬油渣麵，可能會覺得好油膩，其實經過低溫油炸之後，已經逼出咗啲豬油，剩低嘅就係碗上嘅豬油渣啦～入口嘅時候豬油渣香脆可口，唔會覺得好肥膩。而上海麵條口感煙韌，呢碗豬油渣麵份量都算多，可以叫埋其他食物 一齊happy share！另外仲叫咗一碗細嘅三溝，即係魚肉同碗仔翅加埋生菜，手打魚肉嘅份量好多，而且魚肉非常彈牙，加埋果皮、肉絲、蛋花、冬菇同粉絲，唔單止好足料仲好抵食。最後仲叫咗兩款甜品-自家製嘅豆腐花同埋巴斯克芝士蛋糕，兩款甜品各有特色。豆腐花嘅豆味濃郁，又香又滑。而巴斯克芝士蛋糕充滿芝士嘅香味，又唔會覺得好膩。今餐食到好飽呀，下次經深水埗可以再食！