黑木亭居酒屋 (金馬倫道)

今日行過尖沙咀，睇到佢今日做緊優惠，咁一定要encore啦。店鋪晚市基本full曬，足夠人氣。藍蝶花佛手柑熊茶，佢嘅飲品好有特色，基本都會有隻熊仔，今次熊仔仲要包住條被，好得意。飲品飲落佛手柑味唔算好濃，有淡淡檸檬清香，好清爽。綠茶鮮奶熊脆脆，哩隻熊仔又唔同咗，好似翻咁牆。綠茶味好濃，同牛奶好夾，同樣唔會好甜，朱古力脆脆豐富咗口感。黑松露牛油野菌珍寶燒蠔，買一送一，野菌都幾多下，蠔好大一隻，就算黑松露味好重，都唔會蓋住蠔嘅鮮甜肥美。炸蔥吞拿魚蓉鮟鱇魚肝卷，上層係吞拿魚蓉同炸蔥，下層係鮟鱇魚肝卷，鮟鱇魚肝食落好綿密，好似食緊cream。石燒厚切和牛配蔥鹽醬及蘿蔔酸汁，和牛品質好高，仲可以自己掌握熟度，簡直入口即化，搭配嘅蔥鹽醬及蘿蔔酸汁起到畫龍點睛之筆，中和咗和牛油脂，又帶出和牛清香，好味。A5和牛海膽芝士牛角包，好新穎嘅配搭，牛角包落咗大量芝士醬，每一啖都食到和牛海膽同芝士，絕品。每次食完哩間日本餐廳，都比到我驚喜，下次要試下新出嘅熊仔壽喜燒！