胡爐 (已結業)

今日又相約咗朋友到尖沙咀，夜晚去咗餐廳林立嘅厚福街食晚飯。 據朋友所講，呢間火鍋店“胡爐”一向只有單點，依家新開始做埋半放題，又即管睇下呢個“胡爐”又賣咩野藥！先點個胡爐醉鴨煲，一送到枱面香氣撲鼻，材料除咗紅椒、乾葱、蒜蓉、豆瓣醬等，亦加入咗香茅同檸檬葉，唯一小心係個煲比較容易黐底，要間中攪拌一吓。每件鴨件都非常入味，並且散發住清香酒味。完成鴨煲部份，店員就會加入清湯打邊爐，先送上嘅係至尊拼盤，包括時令海鮮拼盤(有海蝦、帶子、生蠔、鮑魚、蜆)同胡爐牛拼盤(有澳洲和牛、牛舌蕊、黑毛豬豚肉)。 海鮮生猛鮮甜有咬口，牛肉亦件件肉味香濃夠厚切。 再嚟就係手工丸餃拼盤(黑松露墨魚丸、手打蝦丸、泰皇鮮蝦雲吞、XO醬带子餃)其中泰皇鲜蝦雲吞同带子丸格外出眾，XO醬味不論聞還是咬落口都非常澎湃。食完咁多肉肉後，當然要order 返啲蔬菜平衡一吓(娃娃菜、唐生菜、粟米)。 除此之外亦有唔少火鍋配料可以選擇：墨魚鬚、廣島蠔、芝士腸、炸魚皮、美國肥牛等……全部可以無限任點。甜品有雪糕！最終埋單每位$298+30(因為星期日所以要加錢)，半放題都做到咁高質，掂！