魚川居 (已搬遷) 新店位置

舊同事生日，適逢今日已經有返堂食，立刻相約出來聚一聚，佢工作地點係觀塘，當地有不少美食進駐，我哋好耐冇食放題，同事搵到一間叫魚川居，有火鍋放題，任飲任食90分鐘，提議去試吓！餐廳位於工業大廈樓上，地方不算大，勝在整潔乾淨。設有自助區，供應飲品、火鍋配料、熟食和冷盤。火鍋放題以牛肉種類分幾個價錢，視乎客人口味！另外每位客人都會奉送海鮮拼盤，有蟹、鮑魚、花螺和帆立貝。呢個係一次性，所有海鮮都好新鮮，蟹內還有不少蟹膏，鮑魚都好大隻，鮮味彈牙。任食火鍋配料除咗自助區有，另外還有任食牛肉、豚肉、廣島蠔等可以寫紙落單。五款湯底有魚有雞，有辣有唔辣，我哋揀咗椰青雞，湯底都好足料，椰青清香鮮甜，鮮雞新鮮嫩滑。牛肉、豚肉色澤鮮艷，肉質鮮嫩，虎蝦大隻鮮甜彈牙，脆鯇腩、廣島蠔新鮮冇腥味，其他配料也有很多選揀！熟食都好好味！白切雞皮爽肉嫩滑，至於炸雞翼和煎午餐肉就係即叫即炸，熱辣辣好香口。最後記得食甜品，奶凍和雪糕都係任食架！