阿來泰式地道風味 (已結業)

咁啱行過深水涉就去埋呢間朋友推廌嘅泰國餐廳，朋友話呢間餐廳嘅菜完全係泰國人煮，好地道，所以就嚟試下。餐牌琳瑯滿目，有飯有粉有小菜有海鮮真係好難抉擇，就連飲品都有好多款泰國特色飲料選擇。先叫咗泰式金邊粉，酸酸甜甜好開胃，份量好多，咁大碟都只係$52認真扺食，而個味道真係會食到停唔到，入面仲有啲應該係魚片嘅肉同埋大大粒嘅蝦仁，唔會齋食粉咁dry。火山軟殻蟹法包，火山係形容多到滿瀉嘅咖喱，不論係食軟殻蟹定法包都係啖啖咖喱，而呢款泰式咖喱得少少辣，以咖喱嘅香料為主，唔食得辣嘅朋友都可以品嘗，好好食好推廌。泰式小食拼盤包括四款小食，炸蝦餅好彈牙；炸春卷材料豐富，入面有肉、蔥、紅蘿蔔等，味道有層次；炸雞翼面脆裏滑；炸冬蔭公餅味道酸酸辣辣，食落口味好新鮮豐富，夠重口味。最後仲有個炒芥蘭有三個味道可以揀(飛天、馬拉盞、蒜蓉)，我地就試咗飛天，味道辣辣地，啲芥蘭爆到好香好入味，又係必叫。