金凱小廚 (已結業)

估唔到係大圍呢個屋邨冬菇亭，都有d CP值咁高既雞煲放題！食物方面有驚喜，本身以為咁既價錢唔會太好食， 但雞煲味道真係不錯，有麻辣既感覺又唔會太辣，醬汁再加埋d洋蔥好惹味！佢上檯既時候基本上都熟左，只要加熱幾分鐘就食得，啱哂超級肚餓既我地！本身以為打邊爐係直接用雞煲個底料再加水，點知仲可以揀湯底！真係超值啊！注重美顏養生既我地，當然揀左花膠雞湯，味道清清地都唔錯，用呢個湯底食出幾種肉既鮮味。串燒味道不錯，肉類唔會烤得太老，味道偏甜，鹹淡適中，唔需要自己額外加調料已經好夠味。蘑菇都唔會烤得好乾，食既時候仲有d菇汁，不錯不錯。侍應既服務態度都幾好，佢地上菜既速度好快，由落單到上菜唔洗幾分鐘就有得食，另外即使有好多客要serve，我跌左幾次筷子，叫佢地再比過都仲好有耐性。之後佢地見我地食肉食得飽飽地，仲主動問我地需唔需要菜籃，頗貼心。環境都ok，餐廳內雖然人多，但個場地都寬闊，檯與檯之間距離唔會好貼近，所以唔算嘈雜。而且有個飲品櫃比大家任君選擇，等大家可以解下膩！