嘉禧餐廳 (已結業)

週二傍晚去咗中環機鐵站接機，由於客人班機延誤咗成兩個鐘，一向唔係咁餓得o既小肥就喺附近覓食。沿著海皮慢慢行，路經一間粉藍色o既西餐店「Le Cleret」，有感為鬧市中難得的一片寧靜，所以就決定走入去嘆返個西式晚餐。小店樓底高高，歐陸式o既裝潢簡潔舒適。XO仔單拖晚膳，好快就應推介點咗客五殼飯主菜，另加$100包埋前菜及甜品。寫好餸，哥哥仔隨即呈上麵包籃。白麵包暖手又鬆軟。帶子雲吞（原價$128；套餐只需另加$100即包有前菜及甜品）：以魚子醬點綴o既意大利雲吞外表非常吸引。意大利雲吞皮層柔軟且夠薄身，入面o既帶子同牛油果餡則脆中帶爽，伴上南瓜蓉作調味感覺健康輕巧，但個人只係略嫌唔夠咸。有機五殼飯伴松葉蟹肉及蟹腳（$288）：有機五殼飯o既飯粒好有嚼口，濕濕地都好易入口。配上鮮甜幼嫩o既松葉蟹肉及蟹腳，菜式清新健美，實屬輕盈之選。意式奶凍（原價$68；套餐只需另加$100即包有前菜及甜品）：奶凍軟滑微甜，清涼可口，舖面o既士多啤梨及藍莓亦鮮香甜美。最後飲埋杯熱檸水作結，腸胃當真舒暢不少。