銀之冰室 (已結業)

今日開始自製長假，所以去先食過開心lunch。第一次去呢一座大廈，喺樓下睇水牌睇下有咩食，見到呢間餐廳個名，即刻上去openrice睇下有咩推介。起初見到個餐牌覺得食個lunch要百幾蚊有啲貴，不過都諗住上去望咗先算。上到去覺得個環境幾靚，又闊落又舒服，一於就試下。坐低咗之後，職員攞個餐牌過嚟，主動介紹下今日個lunch有乜野食，同埋講下今日有乜嘢餐湯，態度好nice又有禮貌。最後我叫咗個all day breakfast。個餐上到嚟，擺盤好靚。今日個餐湯係打咗蓉嘅蘑菇忌廉湯，好好味。因為餐廳係落地玻璃，所以好光猛 環境清淨，慢慢咁嘆午餐，睇下小說聽下歌，感覺非常好。埋單嗰陣時發現，原來畀現金有5% discount，好開心，又賺左呀 ! 收銀嗰個應該係經理，非常之有禮貌咁問下我對今日個lunch有咩意見，值得一讚。下次有機會，我會再約埋啲friend一齊上嚟吹水!