甘饕 (已結業)

我有一位好朋友平日最喜歡食中菜同燒味，今次生日飯就帶左佢來到銅鑼灣既甘鷺，店舖門面設計有心思，招牌係一隻鵝😃！點完菜，老火湯已經馬上送到，今日係霸王花豬骨湯，味道鮮甜，好夠味，飲得出係落足料同埋夠火候，最鍾意有水準既中湯，好味道！頭盤係滷水鵝腸，比想像中有驚喜，滷水味好香，鵝腸好入味，完全唔會韌，仲要幾爽口，芽菜索咗滷水汁好入味，好正！今日主角出場了，甘饕燒鵝，一上碟已經聞到陣油香味，燒鵝皮咬落有少少脆，隻鵝係偏肥美，有油脂同油膏，鵝肉嫩滑多汁，燒得好靚，鵝汁撈飯或者瀬粉真係好夾！叉燒係半肥瘦，條邊燒得好香脆，重蜜汁味，肉質依然鮮嫩可口，燒腩仔肥瘦分明，但又唔會過肥，恰到好處，層皮仲係好脆口，又唔會過厚，食落口感一流！叫左咁多碟肉，要食返碟炒芥蘭平衡下，估唔到都幾夠鑊氣，芥蘭仲係保持到深綠色，食落仲好嫩口，炒得幾惹味！今餐叫得有啲多，食得好飽，好滿意既一餐👏🏻！