hoo韓國包車

營業中

休息中

一講起食韓國嘢，相信好多人都會諗起醬油蟹，今次我哋就一於有啲新意，搵另一類韓國嘢試吓。嚟到呢間餐廳，一打開門已經覺得十分有風味，見到牆身嘅佈置-鐵皮拉閘、洗衣機同埋水吧嘅裝飾，好似返咗韓國嘅地攤檔咁。由於我哋去食嘅時候係午餐時段，避免眼闊肚窄，我哋就諗住兩個人share三樣嘢就啱啱好啦。首先嚟到嘅係招牌炒章魚，上菜嘅時候熱辣辣已經覺得好吸引，章魚咬落唔會韌，唔好睇佢個碟以為好少，蔬菜下面冚埋咗唔少章魚粒，甜甜辣辣好開胃。好味指數： 🌕🌕🌕🌑🌑我哋第二樣柯打係泡菜煎餅，泡菜味唔算十分辛辣，但咬落嘅質感同出面餐廳食薄脆嘅感覺有另一番體會，聽店員嘅建議點上醬汁更加將煎餅嘅香味帶咗出嚟。好味指數： 🌕🌕🌕🌗🌑最後係我哋好期待嘅炸雞，我哋嗌咗甜辣同醬油一雞兩味，唔單只係雞髀，連雞胸嘅位置都好嫩滑，唔會鞋颯颯，除咗份量好足外，每舊雞都有足夠醬汁，充分包裹住香脆嘅外皮，最後成功抱住個肚餓離開。好味指數： 🌕🌕🌕🌗🌑兩個人食到行唔喐都係六百蚊有找，有機會經過尖沙咀記住去試下喇！