富記粥品 (已結業)

聽講富記最出名嘅係魚湯同埋滑雞粥。是晚我地去咗旺角行街，咁就去咗富記食晚飯喇。我地去到約莫八點左右，剛好有卡位，我地唔駛等就入去坐低咗。店員叔叔即刻就俾咗兩杯熱茶同埋兩份用滾水浸住嘅餐具俾我地，非常貼心！我地點咗時菜魚雲湯、椒鹽豆腐同埋西芹炒鮮魷。個魚湯好快就送到，我急不及待飲咗頭啖湯先，嘩，真係好好飲，魚湯有少少奶白色，好清而且一啲都唔腥，好味有營養。另外，個豆腐第一啖咬落去先係熱辣辣兼且皮脆內嫰，仲配埋椒鹽同醋俾我地點嚟食。西芹炒鮮魷嘅份量唔算好多，但係就配咗蝦醬俾我地用嚟點魷魚嚟提鮮，實在好講究喎！總括嚟講，雖然價錢係貴咗少少，但係間中都去支持下老店啦！有機會再去試下個滑雞粥嘅！時菜魚雲湯椒鹽豆腐西芹炒鮮魷