阿堂魚湯 (已結業)

是日口淡淡，想食啲清啲嘅嘢，諗起之前成日經過有間新開嘅魚湯湯飯之類嘅餐廳，又唔係太遠屋企，所以收工特登黎試吓。鋪頭門面唔算好大但係位置都多，嘢食種類亦都唔少。我嗌左個吉列豬扒魚湯烏冬，另外加咗個小食。吉列豬扒魚湯烏冬：個吉列豬扒一上碟嘅時候我呆左，因為好大一塊豬扒～隔離仲有埋胡麻沙律菜，食到滯嘅時候可以食一啖解下滯，幾好。吉列豬扒來講，口感係唔錯嘅，外皮蘇脆，入邊嘅肉都唔會話太乾，不足係佢層皮好容易散，係一咬就散。不過我當日都冇乜太大食慾，所以我直頭拆開佢層皮，淨係食左入面舊肉就算（對唔住，係我侮辱左佢）。餐廳主打鯛魚湯，佢嘅鯛魚湯又的確唔錯，鯛魚味都幾濃，同埋佢係配日本手打稻庭烏冬，味道好夾。小食係鱈魚魚腐。本身見到呢個小食先$28仲寫明有五件都預咗會伏，點知出到嚟又好靚仔。魚腐大大粒，新鮮炸起，彈牙又好味，仲有埋沙律菜。講緊係$28咋！我諗呢度嘅租金一定好平，因為喺香港我哋食緊嘅都係租金～總括嚟講，呢間餐廳嘅性價比係超高，雖然唔可以講話好好食，但至少佢對得住佢嘅價錢，同埋嘢食味道真係唔錯，行經多啲支持下啲小店都幾好呀～