德美壽司 (新都城中心1期) (已結業)

今日經朋友介紹下去咗寶琳嘅德美壽司，餐廳入面接近full晒，好彩出面冇咩人排隊，所以好快就入座。餐廳套餐選擇頗多，例如魚生丼、飯類、定食，送埋沙律、甜品同湯，所以我哋每人叫咗一個套餐。首先上咗沙律同麵豉湯，沙律有炸麵包粒同一片魚生，幾新鮮。麵豉湯鹹淡適中，除左海苔，湯裏仲有豆腐粒。主角出場啦！就係德美海膽魚生丼。估唔到魚生分量超多，有三片三文魚，兩片油甘魚、兩條蟹柳、大量海膽、蟹籽同印住「德美」兩字既甜蛋。刺身非常厚身，海膽creamy，魚生肥美鮮甜，油甘魚肉質爽口，最特別嘅係醋飯內有乾坤，竟然有冬菇，為醋飯加添一份獨特嘅菇香味。女友叫咗銀鱈魚西京燒定食，銀鱈魚油脂高，但唔會話太油膩，肉質相當嫩滑，兩大片分量非常足夠。除此之外，我哋亦叫咗四款串燒，包括燒牛舌、燒雞軟骨、免治雞肉棒同雞皮。牛舌非常爽口，調味啱啱好。另外，免治雞肉棒表面微焦，啖啖肉之餘有咬口。雞皮燒到脆卜卜，好正！最後以甜品作結，仲要係我最鍾意嘅芒果味。