瓏門冰室 (已結業)

突然好想食茶餐廳，所以就入左黎了。其實都無咩特別期望啦，點知又真係幾好食😂。因為朋友係魚素食，所以就只係會食海鮮同齋。我地一齊叫左個紅燒汁鮑魚仔茶餐同埋一個至尊海鮮鐵板。我地仲心諗，邊會真係有鮑魚，點知真係有，仲幾大隻，仲要有五隻！同埋，又軟身又入味！個公仔麵啲湯可能因為有啲鮑魚汁，變得好鮮味，我唔小心連湯都飲埋。麵係較熟，我覺得岩岩好！仲有個蛋，因為我比較鐘意較熟嘅蛋，所以佢個炒蛋岩晒我！仲有個湯好似真係用金寶湯煲出黎嘅，咁成半咪好貴？個至尊海鮮鐵板好足料，3隻青口、4粒帶子仔、4舊大蝦仲有魚。黑椒汁好傳統，我好耐無食過港式黑椒汁突然食返又覺得好好味。鐵板夠熱，係渣渣聲嘅。伊間餐廳加3蚊可以飲到Arabica 豆嘅latte，咁就一試啦。味道又唔差喎，偏nutty，同埋加3蚊好平。我地另外叫多個芝士焗西蘭花，西蘭花有汆燙過再焗，幾腍，所以覺得幾好食。值得一提，有個高高瘦瘦嘅哥仔好好服務。我想要杯溫水，佢突登向杯熱水入面加左三粒冰俾我，又真係整到室溫，個人笑得好誠懇！總結：強推鮑魚公仔麵。真係無違反商品說明條例😂。好抵。