佳記餐廳 (已結業)

呢日下午茶時間見有少少肚餓，就一個人走咗去良景市集，入面嘅佳記餐廳食下午茶。下午茶餐都有幾多選擇，見餐牌上面嘅麵包好吸引，於是就叫咗一份鮮牛油菠蘿包，配熱茶走，盛惠$25。鮮牛油菠蘿包好快就上枱，上枱時熱辣辣，表面香脆鬆化。入邊夾有一塊帶有鹹香嘅牛油。 甜甜嘅脆皮加上鹹香嘅牛油，真係既邪惡又美味。熱茶走，色澤帶金黄，顏色漂亮。口感順滑，味道相當唔錯。今餐嘅麵包及茶走知道都相當唔錯，我諗我久不久都會再返嚟幫襯。