餃餃餃子 (已結業)

本身都幾中意食餃子，方便快捷，簡簡單單又夠飽。時隔接近一年，再黎到餃餃餃子，食物水準保持得住，亦多左啲款式選擇。點左餃子の四種盛盒($55/8隻)，有四種餃子，每樣各兩隻。附上海鹽，用黎點海老，亦即係鮮蝦餃子。蝦肉新鮮彈牙，味道與蝦餃相類似，唔需要蘸鹽或其他醬汁已經夠味，係四款中嘅最愛。其他款式有蘑菇餃子、京都九条蔥餃子同淡路島洋蔥餃子，全部都係蔬菜類，食落新鮮味美。其中蘑菇餃子特別用上米餃子皮，口感更軟綿煙韌。點上自家製辣醬配醬油，充滿層次感。上次已經介紹過呢度嘅獨門辣醬，辣得黎十分有層次，更加係鹹香味俱全，配上不同餃子都十分惹味。山芋係非常有益嘅食物，洋蔥餃子配上芥末山芋蓉($52/5隻)，口感豐富。芥末唔會好辣，山芋蓉黏黏滑滑，更見特別。香口嘅煎餃子要配上生啤，又忍唔住叫左一杯Asahi($58)，假裝一下地道日本人。香港食得到鰻魚飯嘅餐廳越來越少，估唔到反而黎到餃子店會有供應。日式鰻魚飯($68)，都幾抵食。鰻魚肥美甘香，雖然未至於入口即溶，但軟滑肉嫩。最開心係完全食唔到有幼骨，大啖大啖放心咀嚼。