名 料理 (已結業)

星期四晚同朋友揸車嚟到大美督呢間日式料理食晚餐，位置雖然比較隔涉，但勝在坐得舒服，亦可以去附近吹下風或者去三門仔行下。一向都好鍾意日本料理嘅裝修環境，嚟到呢度好似真係去咗轉日本咁。我哋兩個人就叫咗個特盛海鮮鍋，送咗三款嘅刺身，因為我唔食刺身，所以就益晒我朋友喇。特盛海鮮鍋最大賣點就係裏面嗰條魚，真係好新鮮㗎，老闆仲拎咗條鮮魚俾我哋睇吓，即場劏開，幾分鐘就變咗碗入面一塊塊新鮮嘅魚肉。配料方面以蔬菜為主，有白菜、冬菇、金針菇、白頭菇、蜆肉、豆腐、蕃茄、生蠔、海蝦等等。 湯頭方面非常清淡，完全明白佢係為咗突顯魚嘅新鮮，所以唔想用一啲濃味嘅湯底，以免搶咗魚嘅鮮味，果然係只有用新鮮嘅食材先夠膽咁樣煮。最後當然係一掃而空。