影片
更多
2021-03-23
2627 瀏覽
向來好鍾意日本嘅我，只有東北同北海道係未去過，久仰北海道嘅湯咖喱，但一直都冇機會試到，原來係我成日活動嘅鰂魚涌，有一間有日本人開嘅日本菜，正正主打北海道湯咖喱，我會知呢間餐廳係因為KIKI&MAY，而且我鍾意既香港日本藝人Soko都幫襯過，成日係鰂魚涌食野但竟然唔知呢間餐廳，甚至多次行過去食第間日本野，我真係自愧不如。老細唔係北海道人，而係名古屋人，但佢講得一口流利嘅廣東話，當然會有口音，但係以我來講係聽得明佢九成既內容，食之前事前知老細係日本人，落單閒談之間聽到有一個人有啲口音所以就知嗰個係老細，好記得佢既口音會將客人講左做黑人。因為我身邊正正有個日本人朋友，佢同我朋友傾得好開心之餘，仲同我哋傾咗好耐計，原來佢已經學咗廣東話七年，傾傾吓佢就攞咗佢學廣東話嘅書，除咗以前上堂佢仲有一堆書，有廣東話嘅入門，有本係從香港經典電影學廣東話對白嘅書，可見佢真係好鍾意香港文化同埋廣東話，佢打開本書問我有無睇過阿飛正傳，又話睇周星馳電影學到好多廣東話，更甚可以背到《無間道2》入面黃秋生飾演既黃sir對白「殺人放火金腰帶，修橋補路無屍骸」，比起好多人佢更加鍾意香港，更加似係香港人。點解老細會喺香港開間
向來好鍾意日本嘅我，只有東北同北海道係未去過，久仰北海道嘅湯咖喱，但一直都冇機會試到，原來係我成日活動嘅鰂魚涌，有一間有日本人開嘅日本菜，正正主打北海道湯咖喱，我會知呢間餐廳係因為KIKI&MAY，而且我鍾意既香港日本藝人Soko都幫襯過，成日係鰂魚涌食野但竟然唔知呢間餐廳，甚至多次行過去食第間日本野，我真係自愧不如。
老細唔係北海道人，而係名古屋人，但佢講得一口流利嘅廣東話，當然會有口音，但係以我來講係聽得明佢九成既內容，食之前事前知老細係日本人，落單閒談之間聽到有一個人有啲口音所以就知嗰個係老細，好記得佢既口音會將客人講左做黑人。因為我身邊正正有個日本人朋友，佢同我朋友傾得好開心之餘，仲同我哋傾咗好耐計，原來佢已經學咗廣東話七年，傾傾吓佢就攞咗佢學廣東話嘅書，除咗以前上堂佢仲有一堆書，有廣東話嘅入門，有本係從香港經典電影學廣東話對白嘅書，可見佢真係好鍾意香港文化同埋廣東話，佢打開本書問我有無睇過阿飛正傳，又話睇周星馳電影學到好多廣東話，更甚可以背到《無間道2》入面黃秋生飾演既黃sir對白「殺人放火金腰帶，修橋補路無屍骸」，比起好多人佢更加鍾意香港，更加似係香港人。
點解老細會喺香港開間咁嘅餐廳？其實老細最鍾意嘅地方係北海道，十幾年前同前妻回鄉去北海道之後，就鍾意左好大自然既北海道大自然氣息，無論人同野食都同日本其他地方唔同，一去愛上。甚至辭左份工去了解多D北海道，一個人渣住車，用左四個月時間，去過晒北海道嘅所有179個城市、町、村去過晒，仲係餐廳整左一幅好大嘅手繪牆，係一個北海道嘅地圖，會見都唔同城市同景點，將佢去過嘅地方畫咗係間餐廳上面，仲有一D景點既相，見佢咁鍾意去北海道我就問佢最鍾意北海道邊一個地方，佢就係書櫃攞咗個日本旅遊嘅單張，原來係宗谷地區，即係北海道最北面，佢話好鍾意利尻島，可以行山，而且海鮮好好食，之後仲送咗個單張俾我，佢已經做埋推廣北海道嘅大使。係去完北海道之後，被日本公司派駐黎香港工作，之後就愛上左香港。雖然佢好鍾意北海道，但同時都好鍾意香港，所以佢辭左係香港待遇優厚既正職，喺香港(正確黎講係係屋企附近)開一間北海道主題嘅餐廳，佢話屋企行過黎鋪頭只係3、4分鐘距離，所以呢度有北海道最出名嘅湯咖喱食。
講返呢度既野食，湯咖喱係北海道札幌嘅名物，喺札幌就有近二百多間嘅餐廳賣湯咖喱，老細係喺2017年1月開呢間鋪，其實開店頭一年係冇所謂嘅湯咖喱，因為當時搵嘅廚師做唔到佢滿意嘅湯咖喱，之後嚟咗三個廚師終於做到佢滿意嘅湯咖喱，先開始主打呢樣札幌名物，聽佢講呢四年係好辛苦，曾經係2019年係生意最好嘅一年，但因為上年疫情之後生意就變差，就算而家生意都唔係話好好，因為好多公司都wfh，少咗人嚟食，而且因為午市同晚市嘅Menu係一樣，所以午市喺附近返工啲人，晚市就唔會黎食。但佢同時慶幸呢度係鰂魚涌，租金已經比起黃金地區既銅鑼灣、尖沙咀平好多，而且鰂魚涌呢個係一個旺中帶靜既小區，每日忙完午市會去附近買涼茶飲下，同街坊傾下計。係呢個疫情期間，呢D咁有特色既香港小店好值得支持同守護。
隨左main menu，另一個餐牌見到呢度有得飲好多酒，好似Sapporo嘅生啤(大家平時飲嘅Sapporo中文就係解札幌)、日本酒等，酒都係要另外叫，跟餐嘅嘢飲入邊冇酒提供。
-
前菜 （👅: 8/10）
前菜
9 瀏覽
1 讚好
0 留言
大概落咗單5、6分鐘之後嘢食就到，套餐會包前菜、飯同野飲，前菜係一個薯仔沙律同雞湯。
冰凍既薯仔，夾雜住D蛋碎，用咗自家製醬汁，入口即溶，而且幾香甜，口感幼滑好似食緊咁雪糕。
雞湯暖暖，入口係清甜帶雞味，唔係飲緊味精，所以飲完好舒服唔會口渴，係出色既前菜。
-
1️⃣ 雞髀北海道湯咖哩套餐 💰118（👅: 9/10）
＋aside Masara💰5 ＋ 芝士 💰10
湯咖喱飯套餐有得揀主餸，分別有雞髀、豚肉、炸魚柳、雜菜、蝦同牛舌，我四個人分別叫左雞髀、豚肉同雜菜，當中雞髀係最人氣，我去到餐廳個時大約係平日夜晚8點4，原本落左兩個雞髀，落完單佢話雞髀已經得返一個，另一個要轉，可見雞髀係最多人叫。
餐廳有塊黑板，會記錄北海道札幌每日溫度幾多度，而且會教大家點樣食湯咖喱既方法。食湯咖喱嘅步驟，第一步係首先飲一啖湯，第二就係用都羹飯點落啲咖喱湯度，浸一浸再食，第三就係將所有飯倒落個咖哩湯入面食，食法就好似泡飯咁，有詳盡既食法，好似學習緊北海道既文化咁。
唔同餸嘅湯咖喱，佢個湯同佢啲配料都一樣，湯嘅配料有西蘭花、茄子、蓮藕、南瓜、蘿蔔、薯仔、洋蔥、秋葵同雞蛋。
asiri Masara
$5
16 瀏覽
1 讚好
0 留言
同傳統喺札幌嘅食法有啲唔同，湯咖喱都有得加辣度，有兩種，一種係超級辣「death pepper」，而另一種係加咗辣度同香料「asiri Masara」，因為我唔想食太辣所以揀咗第二種。都係要比錢，價錢都係$5。而札幌係免費加辣，但老細之後都有攞一樽辣椒粉俾我哋，但嗰樽辣椒粉就冇咁辣，啱啲食唔到辣嘅人。叫左「asiri Masara」佢係分開上，可以自己調教辣度，一次過落哂其實係幾辣下，建議食得小小辣既落小小試下先。
雞髀北海道湯咖哩套餐
$118
18 瀏覽
1 讚好
0 留言
呢個湯咖喱嘅湯味道比較淡，可能因為湯底係用雞、鰹魚、昆布去熬煮，如果食得辣嘅人我建議加辣粉，本身個湯係好香蕃茄味，比較唔似咖喱湯，入口甘甜，清香唔辣，唔會覺得係食緊味精，完全冇油膩感好健康咁，仲唔會有食完令人口渴嘅味精感添，餸料揀咗雞髀，燜到好腍，輕輕一夾已經骨肉分離，順帶一題呢度啲飯係用北海道米，飯香重兼粒粒分明，但加咗辣粉就似咖喱嘅蕃茄辣湯。湯咖喱其實係一種冇用到麵粉嘅咖喱，對比起其他咖喱，佢質地會冇咁濃稠，個湯會有啲似食拉麵嘅湯底。我冇去過北海道，不過聽人食過話味道係同札幌食到既好似。
除咗佢個湯好飲之外，佢係蔬菜係非常之鮮甜，睇落係好新鮮，唔會見到啲梅左或者黑色嘅蔬菜，而且我係未試過食野佢配料嘅蔬菜，係好食到我會食晒，唔知係煮法令到佢好食定係食材係黎似日本，會食到西蘭花唔係白恰，而係好似有調味過定煎過，薯仔食落非常之腍，而茄子好似吸晒咖喱湯啲油嘅精華，邊食邊好似飲緊湯咁，蓮藕雖然浸左湯但依然食到小小脆既口感，洋蔥我朋友一向唔食，但佢竟然今次會食哂，佢話呢度既洋蔥無苦味，甚至係食到甜味。
主角既雞髀份量非常之大，用湯咖喱熬到雞髀已經入哂味，而且雞髀燜到好腍，無用力一夾已經骨肉分離，非常容易進食，入口肉質係非常嫩滑。
芝士
$10
19 瀏覽
1 讚好
0 留言
飯嘅份量會比較少，但特別嘅係可以加$10加芝士，喺札幌湯咖喱有好多種食法，有啲餐廳甚至會加檸檬喺個飯隔離，而依間就冇。飯係用北海道米，飯香味重，粒粒分明，而札幌既食法都係有得加芝士，所以我都加左，呢啲芝士食落唔係廉價芝士，而係靚既芝士，甚至有人話比札幌個啲更好，芝士上面有小小既焦，所以香味更出，建議要快啲食，因為好快就凍哂，而且芝士同飯已經痴埋一舊融為一體，飯係好食，加埋咖喱湯更加好食，係日本嘅味道。
雖然成個套餐加埋辣、芝士價錢係大概130，但我覺得價錢係值，出面食個貴啲既拉麵都要呢個價錢，香港可能只係貴北海道小小，食到日本既味道，已經係超值。
-
2️⃣ 豚肉北海道湯咖哩套餐 💰118（👅: 8.5/10）
豚肉北海道湯咖哩套餐
$118
10 瀏覽
1 讚好
0 留言
＋aside Masara💰5
唔同餸嘅湯咖喱，佢個湯同佢啲配料都一樣，所以我就唔要重覆介紹。
豚肉食落似平時打邊爐既豬肉片，似係日本豚肉，比較薄身，份量唔算多，甚至覺得蔬菜會更出色過豚肉，可能因為蔬菜真係太好食，不留餘力咁食哂所有蔬菜。
-
3️⃣ 雜菜北海道湯咖哩套餐 💰108（👅: 8.5/10）
雜菜北海道湯咖哩套餐
$108
9 瀏覽
1 讚好
0 留言
本身個湯咖哩已經有好多蔬菜，呢個同前幾個既分別係會多左菇、小栗米，感覺係更加專心食佢地好鮮甜既蔬菜。
味道唔差太多，所以試哂三個覺得雞脾係最出色，如果食湯咖哩，最推介係叫雞，如果未賣哂既話。
-
4️⃣ 燒牛舌 💰80 (一份)（👅: 8/10）
燒牛舌
$80
8 瀏覽
1 讚好
0 留言
大部份嘅小食都有得揀一份或者半份，因為我四個人，所以就叫左一份。
隨左湯咖哩仲叫左兩款小食，第一款就係燒牛舌。
牛舌有四五塊，燒得入味，食落夠腍，不過比較薄身，個人鍾意厚D滿足感大D，但呢塊已經有足夠牛味。
-
5️⃣ 南瓜薯餅 💰60 (一份)（👅: 8/10）
南瓜薯餅
$60
10 瀏覽
1 讚好
0 留言
另一款小食叫左北海道南瓜薯餅，即叫即炸，炸衣好酥脆好薄身，內餡係非常豐滿既南瓜蓉，非常之creamy，而且係見唔到加左任何雜質、麵粉之類，所以一食係食到好重南瓜味同南瓜帶來既鮮甜味，好似食緊天然甜品咁，係唔需要點任何醬汁已經好好食。
-
6️⃣ Mango Passion Fruit Tea 💰+20（👅: 7.5/10）
Mango Passion Fruit Tea
$20
5 瀏覽
1 讚好
0 留言
飲落係比較普通既芒果熱情果茶，加20蚊但感覺無特別好好飲，唔駛加錢既水果味茶已經好足夠，最可惜無得加錢轉酒。
-
🌟味道黎講係日本既味道，未去到日本旅行確實可以止下癮，價錢大概百幾，但百幾食到滿足既日本野確實不為過。石狩鍋三文魚雜菜湯套餐、揚出豆腐、左口魚西京燒都係人氣之選，今次未有機會食到下次會再試，都好值得再試，仲有一個好特別既叫成吉思汗煲，但佢唔係成吉思汗燒牛肉，而係炒羊肉，都係好特色既美食。
呢度既環境，甚至係餐具刻有北海道城市既名，成間餐廳都係充滿北海道既氣氛，老細仲要有時戴住札幌既帽。老細既親切程度令到我好想再去幫襯，佢既熱情係非常真誠，邊傾邊羅啲北海道單張，學廣東話既書比我地睇，睇得出一講起北海道佢就好似開左turbo咁，我都有分享去過佢既家鄉名古屋，比左啲相佢睇，佢一下答到呢間鰻魚飯係邊間餐廳，其實佢已經有兩年無返過日本，佢話都想去下其他地方，九洲、四国都未去過，不過真係太鍾意北海道只可以去北海道。
老細話當時kiki&may拍攝嗰時唔知佢哋喺出名既YouTuber，係店員見到佢哋拍野，同佢講佢先知道，之後呢條片出咗之後好多人特登去叫條片介紹過嘅嘢食，好似芝士飯，雞髀湯咖喱等等，本身依啲嘢食都係老細好推介。可能有見午市食客晚市無再黎，老細話四月將會有新Menu，午市嘅餐單不變，晚市同埋週末餐單會取消set Menu，即係應該唔會有湯咖喱，反而會推出一啲地道北海道菜式，將大家鍾意嘅日本味道帶比大家，如果想食湯咖喱，三月嘅午市同晚市都可以食到，但四月就只有平日午市。老細話怕睇到呢條片嘅人去到餐廳嗰時冇得食湯咖喱會失望，所以佢都有喺Channel下邊留言澄清四月轉Menu一事，並希望我哋like 佢comment等多啲人睇到。
係黎之前有睇過資料餐廳係由一對夫婦經營，個晚見唔到佢老婆只係見到佢，閒談間原來佢同老婆因為人生目標唔同分開左，即使分開左但因為好鍾意香港，所以會堅持夢想，保留呢間餐廳，開一間咁樣既餐廳，為北海道人作出貢獻，唔只係想開一間餐廳咁簡單，而係想成為一個橋梁，令香港人更加認識北海道，就係因為呢個推慶北海道既心，遠比每日開心咁做野每日開心咁活更強，所以同太太分道揚鑣。呢家佢都想搵個新既伴侶，有建議過佢不如係個塊黑板上面寫徵女友，佢笑言其實工作太忙都無時間搵，話香港人定日本人佢都可以，係度我可以順手幫佢徵下女友，如果你好鍾意北海道同香港，相信你地會非常之投契。
賣單之後同老細傾完一輪，佢再次好多謝我哋嚟幫襯，都好多謝kiki&may介紹佢間餐廳，希望之後會佢餐廳會客似雲來，一間咁好食又咁有人情味既日本菜餐廳，一個咁鍾意香港，係度落地生根推廣北海道既人，而且用笑容支持呢家既香港人，應該要繼續札根係鰂魚涌呢一個小區。
-
👅味道: 9/10
🍴環境: 8/10
💰消費: $178人均 (服務費: 10%)
張貼
