幸圓

營業中

休息中

今日去咗朋友鰂魚涌公司樓下嘅幸圓 cafe，見佢裝修同食物都好靚，好適合打卡。一坐低就叫咗杯邪惡嘅Belgian chocolate，每啖都有濃濃嘅朱古力味，仲可以撈埋cream飲，上面做裝飾嘅有一塊半溶嘅朱古力，同樣係高質嘅朱古力。我哋叫咗牛油果粒蟹柳蟹子同青瓜絲沙律做前菜，好適合呢種天氣消暑。朋友叫咗蒲燒鰻魚飯定食，有沙律、味噌湯同漬物，非常豐富。我就叫咗黃金蟹肉窩筍忌廉蟹子扁意粉，蛋黃醬又惹味又creamy，每啖意粉都食到濃沃嘅蟹肉味，同時有杏仁粒同蟹子令口感更加獨特，餐廳亦加咗蕃茄乾同蘆筍，帶出清新嘅感覺，令意粉唔會太油膩。有啲肚餓，我哋仲share咗慢煮紅酒油封鴨腿配自家製雜莓汁，油封鴨非常高質，有好似煙鴨胸嘅香濃嘅鴨味，鴨皮就少少脆，好配合甜甜酸酸嘅雜莓汁，配菜仲有薯蓉薯菜，食到飽飽。最後叫咗宇治金時巴菲做甜品，淨係造型已經攞曬分，香濃嘅綠茶味配合蕨餅、雪糕、cream、紅豆同黑糖漿，全部撈埋一齊食或者分開食可以試到唔同層次嘅口感同味道。