鳳城酒家 (干諾道西) (已結業)

今晚原本想去上環海港開飯，8pm去到門口...人頭湧湧，有大有細唔知等幾耐，轉移陣地，去鳳城望望有無位，見到個場，真係差天共地，「吉」枱多的是，真係咁差？坦白講，之前都有幫襯，但選擇真係比較少。全家人都鍾意食海鮮，對河鮮真係一般；當然最重要係味道，鳳城以小炒同順德菜為主，但水準唔夠隱定，上次食過麻麻，所以好耐無幫襯，今晚食完，大家異口同聲講，短期可再光顧！全家人，五大一小，叫左五餸一羹加甜品，埋單$966，部分菜式在6月前有折扣優惠。整體每樣都可以；小炒選擇比以前多，唔會食嚟食去都係淡水魚，炒鮮奶等等。要數最差的一道菜、就係焗桶蠔，呢個正正就係我上面提及嘅「水準唔夠穩定」的代表作！一入口，成口油，成舊粉槳喺口，賣相比較差，連少少綠色的蔥段都無⋯可能我呢個師奶都煮得好食過佢，呢個餸有D失望！