味真越 (已易手) 新餐廳

南港島線試搭，去完海洋公園，當然去埋探索神秘嘅南區，利東呢個地方真係完全冇踏足過，原來就係大名鼎鼎嘅鴨脷洲。原本諗住食熟食中心，點知熱鬧非常，唯有喺街求其搵嘢食。呢間越菜小店離地鐵站不遠，鋪頭唔大，座位應該只有約二十個，小店嘅格局，夾埋小店嘅價錢，真係買少見少。可能已經比較晏，生牛肉同濛粉兩味主菜都沽清，店主亦不厭其煩咁提醒每一位食客，相當負責任。香茅豬扒撈河多數食店嘅撈粉都係貴過湯粉，反而呢間嘅撈粉平成十蚊。$38大大塊豬扒，撈埋花生碎食，唔洗落太多汁都好好味。扎肉撈河有兩款扎肉，特別版嘅胡椒味好濃，加埋啲菇碎乜乜碎咁，真係非一般嘅扎肉雞絲沙律大份到嘩一聲。絲形物體唔似青瓜唔似薯仔，一問之下原來係青木瓜。平時好驚食木瓜，但呢種一啲木瓜味都冇，好爽口，成個沙律十分出色。泰式鳳爪無骨之餘保留咗筋位，仲好有鳳爪型，口感一流。醃得好夠，略為重口味，撈粉食比較平衡。整體水準不錯，價錢卻係商場鋪嘅一半，值得一試